[無綫][刑偵日記] 晚晚都好忙呀，睇完《大叔的愛》又要追返《刑偵日記》，不過係值得嘅。一直都用「年度心寒之作」嚟做宣傳tagline嘅《刑偵日記》，其實頭8集我都唔覺得心寒（但係好癡線），仲有啲為楊碧芯覺得慘。到今晚播嘅第九集，最後嗰幾分鐘，我真係心都寒埋。
------劇透分隔線------
惠英紅演嘅芯姐，因為覺得自己病發可能會再次害咗對子女，所以決定去處理已經變成佢嘅幻覺之一嘅馬詠（吳沚默 飾）。去到現場一番惡鬥本來已經好睇，中段馬詠消失之後，芯姐想食藥遏止幻像，但又信唔過韋睿傑（袁偉豪 飾）開嘅藥，嗰吓無助做轉折，無論係拍嘅剪嘅寫嘅演嘅都係利害。
之後馬詠再出現，然後交代楊碧芯自己殺自己，又係好變態地利害。去到最後葉勁峰/朱璣（王浩信 飾）出現，勁峰阻止芯姐傷害自己，朱璣爭取機會叫芯姐小心韋睿傑，兩個人格不停轉，令到芯姐以為朱璣係自己幻想出嚟，嗰吓又去返無助。呢幾分鐘惠英紅嘅演技真係教材級。王浩信都做得好，不過惠英紅真係壓倒一切。
又，Momo Ng 吳沚默 由套劇一開始到依家都做得好。 Joey Thye 戴祖儀有驚喜。
📺《刑偵日記》81台翡翠台 周一至五 2130~2230
#無綫 #TVB #刑偵日記
#惠英紅 #王浩信 #吳沚默 #戴祖儀 #袁偉豪
Search